Qazaqstan Respýblıkasy Úkimetiniń qaýlysy  №1091

2015 jylǵy 28 jeltoqsan, Astana, Úkimet Úıi Kásipkerlik sýbektileriniń tizilimin júrgizý jáne paıdalaný qaǵıdalaryn bekitý týraly 2015 jylǵy 29 qazandaǵy Qazaqstan Respýblıkasy Kásipkerlik kodeksiniń 84-baby 1-tarmaǵynyń 1) tarmaqshasyna sáıkes Qazaqstan Respýblıkasynyń Úkimeti qaýly etedi: 1. Qosa berilip otyrǵan Kásipkerlik sýbektileriniń tizilimin júrgizý jáne paıdalaný qaǵıdalary bekitilsin. 2. «Jeke kásipkerlik sýbektileriniń tizilimin júrgizý jáne paıdalaný qaǵıdalaryn bekitý týraly» Qazaqstan Respýblıkasy Úkimetiniń 2014 jylǵy 20 mamyrdaǵy № 511 qaýlysynyń (Qazaqstan Respýblıkasynyń PÚAJ-y, 2014 j. № 34, 325-qujat) kúshi joıyldy dep tanylsyn. 3. Osy qaýly 2016 jylǵy 1 qańtardan bastap qoldanysqa engiziledi jáne resmı jarııalanýǵa tıis. Qazaqstan Respýblıkasynyń Premer-Mınıstri K.MÁSIMOV. Qazaqstan Respýblıkasy Úkimetiniń 2015 jylǵy 28 jeltoqsandaǵy №1091 qaýlysymen bekitilgen Kásipkerlik sýbektileriniń tizilimin júrgizý jáne paıdalaný qaǵıdalary 1. Jalpy erejeler 1. Osy Kásipkerlik sýbektileriniń tizilimin júrgizý jáne paıdalaný qaǵıdalary (budan ári – Qaǵıdalar) 2015 jylǵy 29 qazandaǵy Qazaqstan Respýblıkasynyń Kásipkerlik kodeksiniń (budan ári – Kodeks) 84-baby 1-tarmaǵynyń 1) tarmaqshasyna sáıkes ázirlendi jáne kásipkerlik sýbektileriniń tizilimin júrgizý jáne paıdalaný tártibin aıqyndaıdy. 2. Osy Qaǵıdalarda mynadaı negizgi uǵymdar qoldanylady: 1) bıznes-sáıkestendirý nómiri (BSN) – zańdy tulǵa jáne qyzmetin birlesken kásipkerlik túrinde júzege asyratyn dara kásipker úshin qalyptastyrylatyn biregeı nómir; 2) tizilim – kásipkerlik sýbektileriniń tizilimi – bul kásipkerlik sýbektileriniń sanattary týraly málimetterdi qamtıtyn elektrondyq derekter bazasy; 3) jeke sáıkestendirý nómiri (JSN) – jeke tulǵalar, onyń ishinde qyzmetin ózindik kásipkerlik túrinde júzege asyratyn dara kásipker úshin qalyptastyrylatyn biregeı nómir; 4) «Zańdy tulǵalar» memlekettik derekter bazasy» aqparattyq júıesi (ZT MDB) – bıznes-sáıkestendirý nómirleriniń ulttyq tizilimi, qurylǵan jáne qyzmetin toqtatqan zańdy tulǵalar (fılıaldar men ókildikter), qyzmetin birlesken kásipkerlik túrinde júzege asyratyn dara kásipkerler týraly málimetterdi esepke alýǵa jáne saqtaýǵa, berilgen bıznes-sáıkestendirý nómirleri týraly málimetterdi qalyptastyrýǵa jáne saqtaýǵa arnalǵan aqparattyq júıe; 5) elektrondyq sıfrlyq qoltańba (ESQ) – elektrondyq sıfrlyq qoltańba quraldarymen jasalǵan jáne elektrondyq qujattyń anyqtyǵyn, onyń tıesiligin jáne mazmunynyń ózgermeıtindigin rastaıtyn elektrondyq sıfrlyq sımvoldar jıyntyǵy; 6) Qazaqstan Respýblıkasynyń ulttyq kýálandyrýshy ortalyǵy (UKO) – elektrondyq sıfrlyq qoltańbanyń ashyq kiltiniń elektrondyq sıfrlyq qoltańbanyń jabyq kiltine sáıkestigin kýálandyratyn, sondaı-aq jeke jáne zańdy tulǵalarǵa beriletin tirkeý kýáliginiń durystyǵyn rastaıtyn, «elektrondyq úkimetke» qatysýshylarǵa, memlekettik jáne memlekettik emes aqparattyq júıelerge qyzmet kórsetetin kýálandyrýshy ortalyq; 7) ruqsattar men habarlamalardyń memlekettik elektrondyq tizilimi – berilgen, qaıta resimdelgen, toqtatyla turǵan, kúshi joıylǵan, uzartylǵan, qaıta bastalǵan jáne qoldanysy toqtatylǵan ruqsattar jáne olardyń telnusqalary týraly, sondaı-aq alynǵan habarlamalar týraly málimetter qamtylǵan ruqsattar men habarlamalardyń memlekettik aqparattyq júıesiniń quraýyshy; 8) «elektrondyq úkimet» shlıýzi (EÚSh) – «elektrondyq úkimettiń» aqparattyq júıelerin elektrondyq kórsetiletin qyzmetterdi iske asyrý sheńberinde ıntegrasııalaýǵa arnalǵan aqparattyq júıe; 9) memlekettik organdardyń biryńǵaı kólik júıesi (MO BKJ) – Qazaqstan Respýblıkasynyń aýmaǵynda ornalasqan, vedomstvoaralyq aqparattyq-kommýnıkasııalyq jeliden turatyn, basqarýshylyq jáne uıymdastyrýshylyq maqsattardy iske asyrýǵa jáne olardyń aýmaqtyq bólimsheleri men vedomstvolyq baǵynystaǵy uıymdaryn qosa alǵanda, jergilikti ózin-ózi basqarý organdarynyń, memlekettik organdardyń ózara is-qımyl jasaýyna arnalǵan, sondaı-aq elektrondyq aqparattyq resýrstardyń jáne «elektrondyq úkimettiń» aqparattyq júıeleriniń ózara is-qımyl jasaýyn qamtamasyz etýge arnalǵan telekommýnıkasııalar jelisi. 3. Kásipkerlik sýbektileriniń sanatyn aıqyndaý Kodekstiń 24-babynda kórsetilgen ólshemsharttarǵa jáne olardyń shekti mánderine sáıkes, sondaı-aq Qazaqstan Respýblıkasynyń Úkimeti bekitetin Kásipkerlik sýbektileri jumyskerleriniń jyldyq ortasha sanyn jáne jyldyq ortasha tabysyn esepteý qaǵıdalaryna sáıkes júzege asyrylady. 4. Kásipkerlik sýbektileri týraly derekter tizilimde avtomattandyrylǵan rejımde óńdeledi jáne jyl saıyn 15 jeltoqsanǵa deıingi merzimde jańartylyp otyrady. 2. Tizilimdi júrgizý 5. Bastapqyda Tizilimdi qalyptastyrýdy kásipkerlik jónindegi ýákiletti organ mynalardyń aqparattyq ózara is-qımyl jasaýy arqyly alynǵan aqparattyń negizinde júzege asyrady: 1) Qazaqstan Respýblıkasy Qarjy mınıstrliginiń Memlekettik kirister komıteti (budan ári – MKK) tirkelgen kásipkerlik sýbektileri týraly mynadaı málimetterdi usynady: kásipkerlik sýbektisiniń BSN; kásipkerlik sýbektisiniń JSN; osy Qaǵıdalardyń 6-tarmaǵyna sáıkes kásipkerlik sýbektisiniń sońǵy úsh jylǵy kiristeri týraly derekter; osy Qaǵıdalardyń 6-tarmaǵyna sáıkes kásipkerlik sýbektileri jumyskerleriniń sońǵy bir jylǵy sany týraly derekter; 2) aqparattandyrý salasyndaǵy ýákiletti memlekettik organ mynadaı qyzmet túrleri boıynsha lısenzııalar týraly aqparat alý úshin ruqsattar men habarlamalardyń memlekettik elektrondyq tizilimimen jumys isteýin qamtamasyz etedi: esirtki quraldarynyń, psıhotroptyq zattardyń jáne prekýrsorlardyń aınalymyna baılanysty qyzmet; aksızdeletin ónimdi óndirý jáne (nemese) kóterme saýdada ótkizý; astyq qabyldaý pýnktterinde astyq saqtaý jónindegi qyzmet; lotereıalar ótkizý; oıyn bıznesi salasyndaǵy qyzmet; munaı, munaı ónimderin, gaz óndirý, óńdeý jáne ótkizý, elektr jáne jylý energııasyn ótkizý jónindegi qyzmet; radıoaktıvti materıaldardyń aınalymyna baılanysty qyzmet; bank qyzmeti (ne bank operasııalarynyń jekelegen túrleri) jáne saqtandyrý naryǵyndaǵy qyzmet (saqtandyrý agentiniń qyzmetinen basqa); aýdıtorlyq qyzmet; baǵaly qaǵazdar naryǵyndaǵy kásibı qyzmet; kredıttik bıýrolardyń qyzmeti; kúzet qyzmeti; azamattyq jáne qyzmettik qarý men onyń patrondarynyń aınalymyna baılanysty qyzmet; 3) zańdy tulǵalardy memlekettik tirkeý salasyndaǵy ýákiletti organ osy Qaǵıdalardyń 11-15 tarmaqtarynda aıqyndalǵan tártippen barlyq tirkelgen jáne taratylǵan kásipkerlik sýbektileri týraly, atap aıtqanda: zańdy tulǵanyń BSN; zańdy tulǵanyń ataýy; zańdy tulǵanyń uıymdyq-quqyqtyq nysany týraly málimetterdi beredi. 6. Tizilimdi odan ári júrgizý úshin MKK jyl saıyn 15 qarashaǵa deıingi merzimde kásipkerlik jónindegi ýákiletti organǵa mynadaı aqparatty usynady: 1) aldyńǵy kúntizbelik jyl ishindegi jıyntyq jyldyq kiris mólsheri týraly derekter (onyń ishinde arnaýly salyq rejımi boıynsha jumys isteıtin sýbektiler boıynsha); 2) aldyńǵy kúntizbelik jyl ishindegi jumyskerlerdiń sany týraly derekter. Kórsetilgen aqparat kásipkerlik sýbektileri salyq zańnamasyna sáıkes salyq organdaryna usynǵan salyq eseptiliginiń derekteri negizinde qalyptastyrylady. 7. Tizilimge ózgerister engizý mynadaı jaǵdaılarda júzege asyrylady: 1) osy Qaǵıdalardyń 9-tarmaǵyna sáıkes MKK aqparatynda jiberilgen qatelikke baılanysty kásipkerlik sýbektisiniń sanatty ózgertý týraly ótinishin qanaǵattandyrý. Bul rette aqparattaǵy qatelik MKK-niń kásipkerlik jónindegi ýákiletti organǵa salyq tóleýshi ony jibergenge deıin usynǵan salyq eseptiliginiń derekterine sáıkes kelmeıtin aqparatty usynýy bolyp tabylady. Tıisti jyldyń 15 qarashasynan keıin qosymsha salyq deklarasııalaryn usynýǵa baılanysty salyq tóleýshi týraly aqparattyń ózgerýi qatelik bolyp tabylmaıdy; 2) salyq tóleýshiler kelisken nemese durystyǵyn sot rastaǵan salyqtyq tekserýler nátıjeleri boıynsha osy Qaǵıdalardyń 6-tarmaǵynda kórsetilgen derekterdi ózgertý týraly MKK-niń ótinishi. 8. Kásipkerlik sýbektisiniń sanaty osy Qaǵıdalardyń 4-tarmaǵynda belgilengen merzimde qaıta qaralady jáne osy Qaǵıdalardyń 7-tarmaǵynda kózdelgen jaǵdaılardy qospaǵanda, ózgertýge jatpaıdy. 9. Osy Qaǵıdalardyń 7-tarmaǵyna sáıkes ózgerister engizý mynadaı tártippen júzege asyrylady: 1) kásipkerlik sýbektileri kásipkerlik jónindegi ýákiletti organ aldynda ózderiniń sanatyn zańsyz aıqyndaý týraly máselege rastaýshy qujattardyń kóshirmelerin mindetti túrde qosa otyryp, jazbasha túrde bastamashylyq jasaıdy; 2) kásipkerlik jónindegi ýákiletti organ eki jumys kúni ishinde berilgen ótinishterdi MKK-niń qaraýyna jiberedi; 3) MKK berilgen ótinishterdi negizdiligi turǵysynan qaraıdy jáne on jumys kúni ishinde kásipkerlik jónindegi ýákiletti organǵa tıisti jaýabyn beredi; 4) kásipkerlik jónindegi ýákiletti organ: kásipkerlik sýbektisi ótinishiniń negizdiligi týraly jaýap alǵan jaǵdaıda, úsh jumys kúni ishinde tizilimge tıisti ózgeristeri engizedi jáne sanatty qaıta esepteýdi júrgizedi; kásipkerlik sýbektileri ótinishiniń negizsizdigi týraly jaýap alǵan jaǵdaıda, tizilimge ózgerister engizýden bas tartady; MKK-den qatelikti kásipkerlik sýbektisiniń ózi salyq eseptiligin salyq organdaryna usynǵan kezde jiber­­gendigi týraly jaýap alǵan jaǵdaıda, tizilimge osy Qaǵıdalardyń 4-tarmaǵyna sáıkes ózgerister engizedi. 10. Kásipkerlik jónindegi ýákiletti organ ótinishti qaraý nátıjeleri týraly kásipkerlik sýbektisin jazbasha túrde habardar etedi. Kásipkerlik sýbektileriniń ótinishterin qaraýdyń jalpy merzimi ótinishtiń kásipkerlik jónindegi ýákiletti organda tirkelgen sátinen bastap 15 jumys kúnin quraıdy. 11. Aqparattyq ózara is-qımyl aqparattandyrý salasyndaǵy ýákiletti organmen kelisilgen, memlekettik organnyń jaýapty basshylary bekitken tehnıkalyq talaptar negizinde EÚSh arqyly serveraralyq respýblıkalyq deńgeıde júzege asyrylady. 12. Aqparat almasý UKO bergen ESQ paıdalaný arqyly «suraq-jaýap» rejıminde elektrondyq habarlamalar arqyly júzege asyrylady. 13. Elektrondyq habarlamalar óristeriniń túrleri men quramyn aqparat almasýǵa qatysýshylar tehnıkalyq talaptarda bekitedi. 14. Aqparat almasýǵa qatysýshylar aqparattyq júıeler jumysyndaǵy tehnologııalyq úzilisterdi qospaǵanda, ózara is-qımyl servısterine táýlik boıy qoljetimdilik usynady. 15. Aqparat almasý kezinde aqparattyń qorǵalýy qorǵalatyn MO BKJ paıdalaný esebinen, sonymen birge avtorlyqty rastaý esebinen (ESQ qoldaný), qol qoıylǵan XML habarlamalar, sondaı-aq tehnıkalyq jáne uıymdastyrýshylyq sıpattaǵy is-sharalar esebinen de qamtamasyz etilýi tıis. 3. Tizilimdi paıdalaný 16. Tizilim kez kelgen múddeli tulǵalar, onyń ishinde memlekettik organdar úshin kásipkerlik sýbektileriniń sanaty týraly derekterdiń negizgi kózi bolyp tabylady. 17. Múddeli tulǵalar úshin tizilimde árbir kásipkerlik sýbektisi týraly mynadaı aqparat qoljetimdi bolady: 1) zańdy tulǵalar týraly: BSN; ataýy; uıymdyq-quqyqtyq nysany; sanaty (iri, orta, shaǵyn, onyń ishinde mıkrokásipkerlik); osy Qaǵıdalardyń 5-tarmaǵynyń 2) tarmaqshasyna sáıkes qyzmet túri; 2) dara kásipkerler týraly: JSN; dara kásipkerdiń tegi, aty jáne bar bolǵan jaǵdaıda, ákesiniń aty jáne (nemese) ataýy; birlesken kásipkerlik mártebesiniń bolýy nemese bolmaýy; sanaty (iri, orta, shaǵyn, onyń ishinde mıkrokásipkerlik); osy Qaǵıdalardyń 5-tarmaǵynyń 2) tarmaqshasyna sáıkes qyzmet túri. 18. Tizilimde kásipkerlik sýbektilerin izdeý: 1) BSN nemese JSN; 2) zańdy tulǵanyń ataýy jáne uıymdyq-quqyqtyq nysany; 3) dara kásipkerdiń tegi, aty jáne bar bolǵan jaǵdaıda, ákesiniń aty jáne (nemese) ataýy boıynsha júzege asyrylady. 19. Kásipkerlik sýbektisiniń sanaty týraly aqparat ESQ-men kýálandyrylǵan elektrondyq qujat nysanynda múddeli tulǵalarǵa, onyń ishinde memlekettik organdarǵa jumysta paıdalaný úshin beriledi.